Lucía é cega, e non por iso deixa de gozar de dar longos paseos, realizar as tarefas domésticas, ler as súas novelas preferidas e estar á última en tendencias de deseño.

A súa cegueira tampouco lle impediu ocupar cargos directivos na Delegación da ONCE en Cantabria, pasar polo mundo da política e dirixir a Escola de Cans Guía da ONCE en Madrid.

As novas tecnoloxías foron as súas aliadas no seu desenvolvemento persoal e profesional.

Porén, para Lucía o principal obstáculo é a falta de civismo. Unha gabia sen sinalizar, un bordo sen rebaixar ou unha moto en medio da beirarrúa son as barreiras ás que se enfronta con impotencia. A solución é doada, “valorar igual a todas as persoas tendo en conta as súas características”, como ela mesma reivindica.